ભારતીય ક્રિકેટ કંટ્રોલ બોર્ડે (BCCI)આઈપીએલની આગામી સિઝન માટે બે નવી ટીમોના સમાવેશની વાત કરી છે. BCCI એ બે નવી ટીમોને IPL નો ભાગ બનાવવાની પ્રક્રિયા પણ શરૂ કરી દીધી છે. મીડિયા રિપોર્ટમાં દાવો કરવામાં આવ્યો છે કે બીસીસીઆઈએ ટીમો ખરીદવા માટે રસ ધરાવતી ટીમોને બિડ સબમિટ કરવા માટે 5 ઓક્ટોબર સુધીનો સમય આપ્યો છે. આ સાથે લખનૌ અને અમદાવાદના નામે બે નવી ટીમો જોડાવાની શક્યતા ઘણી વધી ગઈ છે.
બીસીસીઆઈ(BCCI)ના અધિકારી દ્વારા દાવો કરવામાં આવ્યો છે કે નવી ટીમની રેસમાં લખનૌ અને અમદાવાદ મોખરે છે. આ અધિકારીએ નામ ન આપવાની શરતે કહ્યું છે કે આ ટીમો આગળ રહેવાનું સૌથી મોટું કારણ ત્યાંના સ્ટેડિયમમાં વર્લ્ડ ક્લાસ સુવિધાઓ પણ છે.
લખનૌની ટીમમાં રસ દર્શાવનારાઓમાં ગોએન્કા ગ્રુપ અને આદિત્ય બિરલા ગ્રુપ મોખરે છે, જ્યારે અદાણી ગ્રુપ અમદાવાદની ટીમ પર સટ્ટો રમી રહ્યું છે. વિશ્વના સૌથી મોટા ક્રિકેટ સ્ટેડિયમનું નિર્માણ અમદાવાદમાં ગયા વર્ષે જ પૂર્ણ થયું હતું. લખનઉના અટલ બિહારી સ્ટેડિયમમાં પણ તાજેતરમાં આધુનિક સુવિધાઓમાં વધારો જોવા મળ્યો છે.
BCCI ને પાંચ હજાર કરોડનો લાભ મળશે
BCCI એ પહેલાથી જ સ્પષ્ટ કરી દીધું છે કે એક રાજ્યમાંથી માત્ર એક જ ટીમ IPL રમવા માટે માન્યતા મેળવશે. મહારાષ્ટ્રથી મુંબઈ ઈન્ડિયન્સની ટીમ પહેલેથી જ હાજર હોવાથી, અત્યારે ત્યાંથી કોઈ નવી ટીમ બનાવવામાં આવશે નહીં.
આઈપીએલ(IPL)માં બે નવી ટીમોના ઉમેરા સાથે બીસીસીઆઈ(BCCI)ને લગભગ 5000 કરોડ રૂપિયાનો નફો થવાનો અંદાજ છે. આ સાથે આગામી વર્ષે IPL માં મેચોની સંખ્યા પણ વધશે. જાહેર થયેલી માહિતી અનુસાર, આઈપીએલ(IPL) 2022 માં કુલ 74 મેચનું આયોજન થઈ શકે છે.
બીસીસીઆઈ(BCCI)ના એક સૂત્રએ પીટીઆઈને જણાવ્યું હતું કે, “કોઈપણ કંપની 75 કરોડ રૂપિયા ચૂકવીને બિડિંગ દસ્તાવેજ ખરીદી શકે છે. અગાઉ બે નવી ટીમોની બેઝ પ્રાઇસ 1700 કરોડ રૂપિયા માનવામાં આવી રહી હતી, પરંતુ હવે બેઝ પ્રાઇસ વધારીને 2000 કરોડ રૂપિયા કરવાનો નિર્ણય લેવામાં આવ્યો છે.
એવું જાણવા મળ્યું છે કે 3000 કરોડ કે તેથી વધુનું વાર્ષિક ટર્નઓવર ધરાવતી કંપનીઓને જ બિડિંગ પ્રક્રિયામાં ભાગ લેવાની મંજૂરી આપવામાં આવશે. “મને લાગે છે કે ત્રણથી વધુ કંપનીઓને ગ્રુપ બનાવવાની મંજૂરી આપવામાં આવશે નહીં, પરંતુ જો ત્રણ કંપનીઓ ભેગા મળીને ટીમ માટે બોલી લગાવવા માંગતી હોય તો તેમનું સ્વાગત છે.”